Col 2 | JAE | STEP | Aê gabe amac ajala koleŋ kapôêŋ, taŋ gajam kêtu amac to lau Laodikea ma êsêac samob, taŋ sêlic aê laŋôc atom naŋŋa acgom.

Colossians 2

1 Aê gabe amac ajala koleŋ kapôêŋ, taŋ gajam kêtu amac to lau Laodikea ma êsêac samob, taŋ sêlic aê laŋôc atom naŋŋa acgom. 2 Aê gajam koleŋ tonaŋ gebe nêŋ ŋalêlôm êtu malô e têntac êwiŋ ŋanô êmbiŋ êsêac tôŋ ma têtap kauc êkip ŋam saŋa sa tomalageŋ. Go sêjala Anôtônê biŋ ŋalêlômŋa. Biŋ ŋalêlômŋa tonaŋ Kilisi tau. 3 Kauc mêtêŋa to biŋ taêŋ gêjam ŋa tolêlôm-tolêlôm samob kêsiŋ tau gêc Kilisiŋa.

4 Biŋ tonaŋ kasôm gebe lau teŋ sênsau sêôc amac ŋa biŋ ŋalêsi atom. 5 Ôlic tec gamoa jaêc amac, mago ŋoc ŋalau naŋ gaiŋ amac tôŋgeŋ ma têtac ŋajam gebe galic amac amasaŋ nêm gêŋ samob ŋapep to akêŋ gêwiŋ Kilisi ŋajaŋa.

Tasa nêŋ lêŋ tasap Kilisi tôŋgeŋ

6 Amac akôc Apômtau Kilisi Jesu sa su, tec asa nêm lêŋ ambi ŋ taôm tôŋ tamiŋ eŋgeŋ. 7 Nêm ŋawakac êsêp eŋ to amboa taôm sa akô eŋ ŋaô ma akêŋ êwiŋ ŋajaŋa êsa êtôm têdôŋ amacgac, ma anam daŋge êndêŋ Anôtô ênam amac auc.

8 Alic taôm gebe sêlô amac tôŋ ŋa kauc ŋamalacŋa to biŋdansaŋ ŋaôma e atôm lau kapoacwalôŋa nec atom. Biŋ keso tonaŋ ŋam kêsêp Kilisi atom, gelom-gelom aŋga ŋamalacnêŋgeŋ gêmêŋ, ŋam kêsêp ŋaclai nomŋa. 9 Gebe Kilisi tonaŋ Anôtô ŋanô tau gêjam eŋ ôli auc samucgeŋ. 10 Ŋac tau tonaŋ tec kêtu apômtau to ŋaclai samob nêŋ ŋamôkê ma gêbiŋ amac tôŋ e matem jali gêjam amac auc.

11 Ma amac, taŋ eŋ gêbiŋ amac tôŋ naŋ, sêsa amac ŋa lemeŋ atom. Kilisi kêsa amac tec akwalec ôlim nomŋa su. 12 Gêdêŋ taŋ aliŋ busaŋgu naŋ, sêsuŋ amac awiŋ Kilisi. Ma gêdêŋ taŋ aliŋ busaŋgu naŋ, adi sa awiŋ Kilisi amboac tonaŋ. Ŋam gebe amac akêŋ gêwiŋ Anôtônê ŋaclai, taŋ gêŋu eŋ sa aŋga ŋacmatênêŋ naŋ. 13 Ma amac tec agêli biŋsu to asa lêŋ lau samucŋa gêgôm amac atu mêtê nec. Mago Anôtô gêŋu amac matem jali kêsa awiŋ Kilisi. Eŋ kêsuc aêacnêŋ biŋ, taŋ tagêli biŋsuŋa naŋ, samob ôkwi. 14 Eŋ geseŋ papia, taŋ teto ŋagôliŋ sêkic aêacnêŋ biŋŋa kêsêp naŋ, su ma kejoŋ jagêjac kêpi kakesotau. 15 Aŋga kakesotau Kilisi kêku apômtaui to ŋaclai tulu ma kêtôc êsêac gêdêŋ lau samob sêlic ma kêtê wê siŋ kêpi nê ŋacjo.

16 Amboac tonaŋ lau teŋ sêmêtôc amac êtu gêŋ aniŋ to anômŋa me êtu alic om ŋagêdô me ajôŋ êsô ŋaom me sabat atom. 17 Gêŋ tonaŋ ŋai têtu ŋanô, taŋ mêŋêsaŋa naŋ ŋadôŋdôŋ, ma ŋanô tau Kilisi. 18 Lau ŋagêdô sêmoa, taŋ sêsau sêbu tauŋ ŋanô to sêjam sakiŋ aŋela. Êsêac tetoc tauŋ sa kêtu katuŋ kaiŋ teŋ kêsa ma sêlic gêŋ ŋakatuŋa. Nêŋ kauc nomŋa kêkiaŋ êsêac sa ŋaômageŋ. Akô ŋajaŋa gebe lau amboac tonaŋ sêku amac tulu atom. 19 Êsêac sêsap Kilisi, taŋ kêtu môkêapac naŋ, tôŋ atom. Kilisi tau gêlôm tau ôli to kêkêŋ ŋaduc to ŋawalô gedeŋ ôli ŋagêŋlêlôm tôŋ e kesewec to kêtôp kêtôm Anôtô tau gêsuŋ ŋaclai.

Kilisi gêbiŋ aêac tôŋ tec tamoa mateŋ jali

20 Aŋlac amac êndu awiŋ Kilisi, tec kêgaboac amac su aŋga ŋaclai nomŋa. Amboac ondoc tec asa lêŋ nomŋa to asô ŋagôliŋ tonec ŋalabu gebe 21 “Ôkôc gêŋ tonec atom. Ônsaê gêŋ tônê atom. Ômoasac gêŋ tonec atom.” 22 Ŋagôliŋ tonaŋ ŋamalac sêmasaŋ to têdôŋ ma kêkanôŋ gêŋ ênêc teŋgeŋ atomŋa. Embe tanam kôm gêŋ tau su, oc êmbacnê. 23 Êsêac sêjam sakiŋ aŋela to sêbu tauŋ ma sêkôniŋ tauŋ ôliŋ. Ŋagôliŋ tonaŋ kêtôm gebe ênac lau mateŋanô auc e sênam kauc sebe biŋ tokauc. Mago gêŋ samob tonaŋ ŋai kêtôm gebe êkôniŋ têntac ŋakalac tôŋ atom.